(Barcelona) 26 Jan 2020. Kooxda kuabdda cagta Barcelona ayaa lagu soo waramayaa inay dalab 67 milyan gini ah ka gudbisay weeraryahanka Naadiga Manoco ee Wissam Ben Yedder laga soo diiday kooxda difaacanaysa horyaalka La Liga.
Kooxda haysata horyaalka Spain ayaa la fahansan yahay inay suuqa ugu jirto weeraryahan cusub, iyadoo Luis Suarez uu muddo dheer garoomada ka maqnaan doono kaddib markii qalliin jilibka looga sameeyay.
Weeraryahanka Kooxda Arsenal ee Pierre-Emerick Aubameyang iyo kan Chelsea ee Olivier Giroud ayaa ka mid ah kuwa la la xiriirinayo inay u dhaqaaqi doonaan kooxda uu maamulo ee Quique Setien ka hor dhammaadka bishaan.
Si kastaba ha noqotee, sida laga soo xigtay Footmercato, Ben Yedder oo dhaliyay 14 gool 18 kulan oo uu u saftay horyaalka Ligue 1 xilli ciyaareedkan kooxdiisa Monaco ayaa bartilmaameedka koowaad u ah kooxda Gobolka Catalonia ka dhisan in kastoo dalabkoodii ugu horreeyay laga soo diiday.
Warbixinta ayaa sheegaysa in kooxda Barca ay dalab wayn hor dhigtay kooxda Monaco, kaas oo ku kacayay 80 milyan oo euro oo u dhiganta 67 milyan oo gini, laakiin waxaa si dhaqso leh loogu wargaliyay in ninka reer France aan lagu heli karin qiimahaasi.
Ben Yedder ayaa dhaliyay 70 gool 138 kulan uu u saftay muddadii uu joogay Kooxda Sevilla oo ay ku jirto 38 gool oo uu dhaliyay 91 kulan oo uu ka ciyaaray horyaalka La Ligaha Spain.
Dhibaatooyinka dhaawac ee Ousmane Dembele ayaa ka dhigtay Barca inaysan lahayn Weerar tayo sare leh, Tababare Setien ayaana guuldarradii ugu horreysay xalay kala kulmay kooxda Valencia ciyaar ku dhammaatay 2-0.
Gool FM.