(Yurub) 02 Abril 2020. Xiddigaha Olivier Giroud iyo Karim Benzema ayaa hawada isku mariyay hadalo kul kulan oo murun dhaliyay xilliyadii lasoo dhaafay.
Xiddiga kooxda Real Madrid ee Karim Benzema ayaa cadeeyay inaan lala bar-bardhigi karin Olivier Giroud, kaddib markii uu tilmaamay inay kala yihiin gawaarida ciyaaraha ee kala ah Formula 1 iyo Karting, iyadoo ay arrintaas ka careysiisay Giroud.
Haddaba weeraryahanka kooxda Barcelona iyo xulka qaranka France ee Antoine Griezmann ayaa wuxuu ka hadlay murunka ka dhix jira xiddigaha Olivier Giroud iyo Karim Benzema, wuxuuna yiri:
“Sheekadan oo dhan kama jawaabi karo, sababtoo ah haddii aan ka jawaabo waxay arrinta ku dhamaan doontaa fowdo, waxaana sababi karaa dhibaato hor leh”.
“Laakiin waan jeclahay Olivier Giroud … waa ciyaaryahan fiican wuxuuna naga caawiyay inaan ku guuleysto Koobka Adduunka, tanina waa guul iyo arrin muhiim u ah nolosha” ayuu yiri Antoine Griezmann.
Gool FM.