(Lisbon) 23 Agoosto 2020. Tababaraha Jarmalka ah ee leyliya kooxda Paris Saint-Germain Thomas Tuchel ayaa ku tilmaamay Bayern Munich inay tahay koox weyn ee xoogan, isla markaana khibrad u leh kulamada finalka ah.
Garoonka The Estadio da Luz ayaa caawa marti gelinaya Final-ka Champions League 2019-20, kooxda reer France ee Paris Saint-Germain oo markeedii ugu horreysay iska xaadirisay Final-ka tartankan ayaa qaabilaysa Kooxda reer Jarmal ee shanta goor ku guuleysatay koobka ee Bayern Munich.
Haddaba Thomas Tuchel oo ka soo muuqday shirka jaraa’id ee kahor ciyaarta caawa ka dhici doonta garoonka Estadio da Luz magaalada Lisbon ee dalka Portugal ayaa yiri:
“Bayern Munich waa koox weyn oo aad u xoogan, waxayna khibrad u leedahay kulamada finalka ah”.
Thomas Tuchel ayaa sidoo kale tilmaamay in kooxdiisa Paris Saint-Germain ay u ciyaari doonto isla qaabkii ay kula ciyaareen RB Leipzig kulankii wareega afar dhamaadka ee Champions League, wuxuuna carabka ku adkeeyay qorsho ciyaareedkoodii kulankii la soo dhaafay uusan waxba ka badeli doonin ciyaarta caawa ee finalka.
Dhinaca kale Tuchel ayaa xaqiijiyay in faahfaahino yar-yar ay go’aamin doonaan ciyaarta, isagoo caddeeyay inuusan beddeli doonin qaabkiisa ciyaareed kulanka caawa ee finalka, laakiin uu sii wadi doono qaab lamid ah qorshihii uu ku soo ciyaaray kulamadii hore.
Gool FM.