(Paris) 27 Agoosto 2020. Xiddiga reer Brazil ee Thiago Silva ayaa si rasmi ah u shaaciyay ka tagistiisa kooxda reer France ee Paris Saint-Germain xagaagan.
Thiago Silva ayaa farriin macsalaameyn ah uu ku soo qoray boggiisa rasmiga ah ee Instagram-ka, waxay u dhigneyd sidan:
“Maanta safarka wuu dhamaanayaa 8 sano kaddib ee aan qeyb ka ahaa safka kooxda PSG”.
“Waxaan u mahadcelinayaa maamulka, taageerayaasha iyo dhamaan shaqaalaha farsamada iyo ciyaartoydeyda kale, waa qoyskeyga”.
“Waxaan ku noolaa daqiiqado aan la rumeysan Karin, carruurteyda waxay ku koreen Paris”.
“Waxaan noqonay muwaadiniin Faransiis ah, dalkan iyo xusuustiisa cajiibka ah waxay ku nagaan doonaan qalbigeyga, mahadsanid”.
Qandaraaska Thiago Silva ee kooxda PSG ayaa dhacay 30-kii June, waxaana loo kordhiyay labo bilood oo dheeri ah, si uu u dhameysto olalihiisa kooxda ee tartanka Champions League, kaasoo ugu dambeyntii ay ku guuleysteen Bayern Munich.
Si kastaba ha noqotee, Kooxda kubadda cagta Chelsea ayaa la soo warinayaa inay todobaadkan dhammaystirayso saxiixa daafaca reer Brazil ee Thiago Silva.
Gool FM.