(Paris) 02 Seb 2020. Paris Saint-Germain ayaa dooneysa inay lasoo saxiixato xiddiga heerka caalami ee dalka Spain iyo kooxda kubaddca cagta Arsenal ee Héctor Bellerín, inta lagu guda jiro suuqa kala iibsiga xagaagan.
Héctor Bellerín ayaa haatan ah xiddigaha ugu caansan ee kooxda Arsenal, hadana waa ku xigeenka kabtanka Gunners, isagoo qeyb ka ahaa safka kooxda Arsenal xilli ciyaareedkii ugu dambeeyay ee tababaraha reer France ee Arsene Wenger.
Sidaasoo ay jirto haddana Héctor Bellerín ayaa u faran fikrada uu kaga tagayo Arsenal xilligan, maadaama 25 jirkan uu doonayo inuu u wareego koox leh karti iyo hami sare.
Daafaca midig ee reer Spain ayaa in muddo ahba wuxuu xiiso ka helayay kooxaha Bayern Munich iyo Juventus, balse sida ay ku warramayso “Football London” kooxda Paris Saint-Germain ayaa sii xoojisay xiisaheeda ku aaddan inay iibsato Héctor Bellerín.
PSG ayaa isku diyaarineysa inay u gudbiso Arsenal dalab 35 million pounds ah si ay u hesho adeega Héctor Bellerín, kaasoo horey u diiday fursad uu ugu biiri karay kooxda ka dhisan caasimada Faransiiska markii Unai Emery uu macalinka ka ahaa naadiga reer France ee PSG.
Laakiin hadda Bellerín wuxuu si qoto dheer uga fikiri doonaa talaabadan, gaar ahaan kaddib markii Paris Saint-Germain ay gaartay finalka Champions League sannadkan, halka Arsenal ay inta badan ka maqneyd tartanka Champions League sanadihii la soo dhaafay, maadaama Héctor ay u diiwaan gashan tahay 15 kulan uu ka ciyaaray guud ahaan taariikhdiisa tartankan.
Gool FM.