(London) 06 Okt 2020. Weeraryahanka kooxda Chelsea Olivier Giroud ayaa shaaca ka qaaday nooca xiriirka uu la leeyahay xiddiga naadiga Real Madrid ee Karim Benzema, kaddib markii ay hadalo kulul is dhaafsadeen bilihii lasoo dhaafay.
Karim Benzema ayaa laga reebay liiska xulka France shantii sano ee la soo dhaafay, laakiin Olivier Giroud ayaa rumeysan in weeraryahanka Real Madrid uu u qalmo inuu xirto maaliyada xulkiisa qaranka.
Olivier Giroud ayaa wareysi uu bixiyay wuxuu ku sheegay:
“Ka saarista Benzema ee xulka qaranka? Waa wax laga xumaado, sababtoo ah wuxuu ahaan doonaa ciyaaryahan layaableh marka loo fiiriyo astaamahiisa”.
“Ma jirin wax khilaaf ah oo naga dhexeeyey, taareekhda waxay rabtay inaan iska hor imaano”.
“Marwalba waxaan la lahaa isfaham wanaagsan oo ixtiraam badan, uguyaraan aniga ahaan xaggiisa, wax walba oo dhacay waa nasiib darro, laakiin hadda waa inaan horay uga soconaa”.
“Dabcan, waqtigaas, markii si qalad ah laygu eedeeyay maqnaanshaha Karim Benzema, way i taabatay”.
“Buuggayga ayaan kaga hadlay, saameeyn ayeey nagu yeelatay aniga iyo inta ii dhowba, laakiin waxaan sii waday cadeynta inaan uqalmo booskeyga iyo dagaalka la sheegayo inuu igaala dhexeeyo Benzema ay dadka qaar been abuurteen”.
“Waxba kuma lihin, waxaan ka ciyaarnaa boos isku mid ah. Waa ay dhacday, laakiin si fiican ayaan uga falceliyay dhibaatooyinkaas”.
Gool FM.