(Manchester) 15 Nov 2016 Daafaca kooxda Celtic ee Kolo Toure ayaa kulataliyay walaalkiis Yaya Toure inuu isaga tago kooxdiisa Manchester City.
Yaya Toure ayaan u ciyaarin kooxdiisa Man City tan iyo 24-August ee sanadkaan, tababare Pep Guardiola ayaana u sheegay inuusan ciyaarsiin doonin ilaa wakiilkiisu uu raaligaliyo kooxda.
Laakiin Kolo Toure ayaa kula taliyay walaalkiis inuu hawa gadis sameeyo isla markaana uu u dhaqaaqo horyaalka Faransiiska gaar ahaan kooxda Olympique Marseille.
“Wali waa laacib tayo leh awoodana inuu wax qabto” ayuu u sheegay Kolo Toure idaacada radio montecarlo ee dalka faransiiska.
“Dabcan waqti adag ayuu haatan ku qaadanayaa Man City, dhamaanteen waan soo marnay taas oo kale, waxaad tagaysaa meel sare mararka qaarna hoos ayaad u soo dhacaysaa”.
“Waa inuu fahmaa taas, waa inuu sameeyaa hawo gadis, si uu u aado meel dadku ay ka doonayaan, dhabtii wali kalama hadlin u dhaqaaqida Marseille, wali wuxuu joogaa Man City”.
“Waan ixtiraamayaa taas laakiin Marseille waa koox wayn”.
Gool FM