(Manchester) 11 Feb 2021. Kooxda reer France ee Paris Saint-Germain ayaa maanta oo khamiis ah shaacisay heerka dhaawaca xiddigooda reer Brazil ee Neymar Jr, iyo mudada uu garoomada ka maqnaan doono.
Paris Saint-Germain ayaa ku sheegtay bayaan ay soo dhigtay website-keeda rasmiga ah, in markii Neymar lagu sameeyay raajooyin iyo tijaabooyin caafimaad, la ogaaday inuu ka dhaawacmay muruqa isku xira lugta bidix.
Bayaanka ayaa lagu muujiyay in ciyaaryahanka reer Brazil uu ka maqnaan doono safka kooxda Paris Saint-Germain muddo 4 isbuuc ah.
Sidaas darteed waxaa la xaqiijiyay in Neymar Jr uu ka maqnaanayo labada kulan Barcelona ee wareega 16-ka tartanka Champions League.
PSG ayaa ku booqan doonta Barcelona Talaadada soo socota garoonka Camp Nou, halka labada koox ay ku kulmi doonaan 11-ka bisha March, garoonka Parc des Princes.
Neymar Jr ayaa dhaawacmay 55 daqiiqo kaddib kulankii Paris Saint-Germain ay kula ciyaartay Caen tartanka Coupe de France.
Gool FM.