(Madrid) 14 Abriil 2021. Kooxda kubadda cagta ee Real Madrid ayaa kalsooni xad dhaaf ah ku qabta saxiixa xiddiga kooxda Paris Saint-Germain ee Kylian Mbappe xagaagan sida ay sheegayaan wararkii ugu dambeeyay.
Xiddiga xulka qaranka Faransiiska kula guuleystay Koobka Adduunka ayaa PSG kula jira qandaraas dhici doona bisha June ee sanadka dambe, waxaana xusid mudan in kooxda reer France ay dalabaadyo heshiis kordhin ah usoo bandhigtay si ay kaga hor istaagto u dhaqaaqista Madrid.
Hase yeeshee, Mbappe ayaa saddex jeer iska diiday yabooh qandaraas kordhin ah oo ay PSG usoo bandhigtay, taasoo si gaar ah usoo jeedisay dareenka kooxda caasimadda Spain ka dhisan.
Wararka ka imaanaya dalka Faransiiska ayaa sheegaya in 21-jirka weerarka ka ciyaara uu raadinayo fursad uu ugu biiro kooxdii uu caruurnimadiisa ku haminayay, sidaa awadeedna uu ka fiirsanayo inuu qandaraas cusub u saxiixo kooxda Paris.
Si kastaba ha ahaatee, majaladda Goal ayaa warineysa in Los Blancos awooddeeda ku tijaabineyso xagaagan soo xero gelinta Mbappe.
Maadaama laacibkan bilaash lagu heli karo xagaaga dambe, Madrid ayaa ku kalsoon inay PSG aqbali doonto qiimo macquul ah halkii ay ku lumin lahayd qiimo la’aan sanad kaddib.
Gool FM.