(Madrid) 29 Juun 2021. Kooxda kubadda cagta Real Madrid ayaa maalmo kahor ku dhowaaqday inay iska fasaxday kabtankeedii Sergio Ramos kaasoo wixii berri ka dambeeya bilaash ugu biira kara kooxdii uu doono maadaama qandaraaskiisu ku eg yahay 30-ka bisha Juun.
Sidaas darteed, Ramos ayaa lala xiriiriyay qaar ka mid ah kooxaha ugu tunka weyn qaaradda Yurub oo ay ku jiraan Manchester United iyo kooxdiisii hore ee Sevilla, hase ahaatee, majaladda ESPN ayaa sheegtay inuu difaaca Isbaanishka ah qiimeyn ka wado dalabaad kaga yimid kooxaha Manchester City, Bayern Munich iyo Paris Saint-Germain.
Ilo ay xogtan ka heshay ESPN ayaa sheegaya inuu Ramos qiimeynayo faa’idooyinka iyo caqabadaha barbar socda heshiisyada ay doonayaan saddexdan kooxood inay kula wareegaan iyo fursadaha uu heli karo inuu heer sare kusii ciyaaro.
Si kastaba ha ahaatee, Man City ayaa lasoo sheegay inay diyaarisay yabooh qandaraas labo sano ah oo uu xiddigan ugu biiri karo kooxdooda, balse waxay loollan kala kulmayaan kooxaha dhaqaalaha iyo awoodda ay ku leeyihiin horyaalladooda ku faanaya ee Bayern iyo PSG.
Dhinaca kale, warar dhowaan soo baxayay ayaa sheegaya inuu 35-jirka daafaca dhexe ka ciyaara uu daneynayo ku biirista Manchester United in ka badan kooxaha kale, balse ESPN ayaa xaqiijisay inaysan Red Devils u dhaqaaqin soo xero gelinta Sergio Ramos.
Gool FM.