(Yurub) 28 Okt 2021. Laacibkii hore kooxaha Barcelona iyo Chelsea ee Cesc Fabregas ayaa sheegay in Antonio Conte uu yahay tababarihii ugu adkaa ee uu ka soo hoos shaqeeyay.
34-sano jirkaan ayaa Monaco kula jira heshiis dhacaya ilaa iyo June 2022, waxaana uu horay ula soo shaqeeyay labo tababare oo Talyaani ah, ee kala ah Maurizio Sarri iyo Antonio Conte.
Fabregas ayaa wuxuu bartiisa Twitter-ka, waqti dheer kula qaatay taageerayaashiisa, isagoo kaga jawaabay su’aalo aad u xiiso badan, wuxuuna caddeeyay inuusan meesha ka saari doonin inuu u dhaqaaqo mid ka mid ah kooxaha Serie A dhammaadka xirfaddiisa.
Fabregas: Tababaraha ugu adag waa Antonio Conte, Fabregas ayaa sidoo kale xusay in Antonio Conte uu ahaa tababarihii ugu dhibka badnaa ee abid macalin u soo noqday xirfadiisa ciyaareed, maadaama tababarihii hore ee Juventus iyo Chelsea uu caan ku yahay neerfaha.
Antonio Conte ayaa tababare u noqday Fabregas intii uu joogay Chelsea, waxaana ay si wada jir ah ugu guuleysteen horyaalka Premier League iyo FA Cup.
Conte ayaa dhawaan lala xiriirinayay inuu ku laabanayo Premier League si uu u hoggaamiyo Manchester United isagoo bedelaya Solskjaer kaddib markii Red Devils ay guuldarro 5-0 ah kala kulmeen Liverpool.
Gool FM.