(Yurub) 05 Nof 2021. Halyeey kooxda Barcelona ah ayaa codsaday in weeraryahanka Bayern Munich ee Robert Lewandowski uu ku guuleysto abaal-marinta Ballon d’Or sanadkan.
33-jirkan ayaa ka mid ah musharixiinta ugu cad-cad abaal-marintan, kaddib bandhiggii wacnaa ee uu sanadkan ku sameeyay kooxda Bayern Munich.
Haddaba Luis Suárez oo abaal-marinta Ballon d’Or ku soo guuleystay sanadkii 1960-kii ayaa wareysi uu ku bixiyay Cadena SER wuxuu ku sheegay:
“Hala siiyo Robert Lewandowski abaa-marinta Ballon d’Or, haddii uusan helina, waxaan siin doonaa abaal-marin aniga qaas ii ah.”
Halyeyga Barca ayaa horay abaal-marintan u hantay sannadkii 1960-kii, kaddib markii uu ku guuleystay inuu ku garaaco halyeygii reer Hungary ee Ferenc Puskas.
Suarez waxa uu xirnaa maaliyada Barcelona muddo 7 sano ah, kahor inta uusan ku biirin Inter Milan sanadkii 1961-kii.
Robert Lewandowski ayaa ka fiicnaaday dhammaan weeraryahanada Yurub xilli ciyaareedkii hore, si uu ugu guuleysto kabta dahabka ah kaddib markii uu 41 gool ka dhaliyay Bundesliga.
Gool FM.