(Yurub) 04 Nof 2021. Waxaa gabo-gabo ku dhow dhammeystirka wareegga guruubyada tartanka Champions League iyadoo is-aragyadii lugta labaad ee wareeggan ay bilawdeen toddobaadkan, waxaana lasii iclaamiyay xilliga la qaban doono isku aadka wareegga bug-baxda ee tartanka.
Wareegga 16-ka tartanka Champions League xilli ciyaareedka 2021/22 ayaa lagu qaban doona magaalada Nyon ee dalka Switzerland marka la gaaro 13-ka bisha December ee sanadkan markaas oo ku beegan kaddib marka lasoo gaba-gabeeyo kulammada wareegga guruubyada ee tartanka.
Sidoo kale, kulammada lugta hore ee wareegga 16-ka ayaa ay UEFA shaacisay in la ciyaari doono taariikhaha 15-16 February iyo 22-23 February, halka kulammada lugta labaadna la ciyaari doono 8-9 March iyo 15-16 March.
Sida caadiga ah wareegga 16-ka tartanka ayaa waxaa isku arki doona siddeedda naadi ee kusoo baxay boosaska koowaad ee guruubyadooda iyo siddeedda kusoo baxday boosaska labaad, balse waxaanan is-arki doonin kooxaha isku dalka ka dhisan iyo kuwa kasoo wada baxay hal guruub.
Gool FM.