(Barcelona) 02 Jan 2022. Ronaldinho ayaa lagu tiriyaa halyeey kooxaha Barcelona iyo Paris Saint-Germain waxayna u muuqataa in hadalkiisii ku aadanaa bixitaankii saaxiibkiis hore ee Lionel Messi uu kaga tagay Catalans uguna biiray PSG ay ka careysiisay kooxda reer Spain.
Sida lagu sheegay warbixin uu daabacay wargeyska Mirror ee ka soo baxa Ingiriiska, Barcelona ayaa aad uga carootay Ronaldinho oo mushahar uga qaata kooxda danjirenimo, kaddib hadalkiisii ahaa in ku biiristii Lionel Messi ee kooxda Paris Saint-Germain ay u ahayd kedis farxadeed.
Ronaldinho oo goobjoog ka ahaa billowgii Messi ee xirfadiisa Barcelona, ayaa wargeyska Mirror u sheegay:
“Aad ayaan ugu faraxsanahay inaan Messi ku arko Paris Saint-Germain, oo ah koox boos muhiim ah ku leh qalbigeyga.”
Halyeeyga reer Brazil oo hadalkiisa sii wata ayaa yiri: “Ma aanan fileyn in heshiiskan uu dhacayo, waxa aan u malaynayay in Messi uu mustaqbalkiisa ku soo gabagabeyn doono Barcelona”
“Waxay ahayd lama filaan, laakiin si gaar ah ayeey layaab iigu noqotay.” ayuu hadalkiisa ku soo xiray Halyeeyga reer Brazil ee Ronaldinho.
Gool FM.