(Barcelona) 31 Jan 2022. Sida ay wararku sheegayaan, xiddiga naadiga Barcelona garabka uga ciyaara ee Ousmane Dembele ayaa heshiiska shaqsiga ah la gaaray naadiga Paris Saint-Germain oo la filayo inuu ku biiro saacadaha ka harsan suuqa kala iibsiga jiilaalka.
Suxufiga Isbaanishka ah ee Guillem Balague ayaa sheegay in heshiiska uu laacibka Faransiiska ah ugu laabanayo dalkiisa la dhammeyn doono maanta oo Isniin ah haddii ay labada naadi ku heshiiyaan qiimaha lagu kala iibsanayo.
Barca ayaa lasoo warinayaa inay iibka Dembele ku dooneyso 16.6 milyan oo gini halka uu ugu fadhiyo lacag bilawgeeda uu ahaa 96.8 milyan oo gini kahor gunnooyinka markii ay kala soo wareegeysay kooxda Jarmalka ka dhisan ee Borussia Dortmund.
Haddii uu iibkan hirgalo, kooxda Macallin Xavi Hernandez oo goor hore si cad ugu sheegtay inuu 24-sano jirkan koox kale raadsado ayaa heleysa boos u bannaan mushaharka xiddigaha ay dooneyso iyadoo la filayo inay soo qaadato midkood Alvaro Morata oo ka tirsan Juventus iyo weeraryahanka Arsenal ee Pierre-Emerick Aubameyang.
Gool FM.