(Paris) 01 Feb 2022. Kooxda kubadda cagta Paris Saint-Germain ayaa laga cirib-tiray tartanka Coupe de France, xilli Lionel Messi uu markii ugu horreysay xalay xirtay lambarka 10-aad ee PSG.
Naadiga Nice ayaa xalay rigooreyaal tartanka Coupe de France kaga tuurtay PSG, kaddib markii la isku mari waayey goolal la’aan 0-0 ah.
Kooxda ka dhisan caasimadda Faransiiska ayaa xalay isku shaandheyn ku sameysay lambarradeeda, waxaana xiddigaha qaar ay ku ciyaareen lambarro aan ahayn kuwii lagu yaqaanay ee sida rasmiga ah ay kooxda ugu xiran jireen.
Xiddigahaas waxaa ka mid noqday Lionel Messi oo lagu taagay lambarka uu caanka ku yahay ee 10-aad, kaasoo uu inta badan wakhtigiisii Barcelona soo xirtay sidoo kalena uu haatan u qaato xulkiisa qaranka Argentina.
Yeelkeede, lambarka 10-aad ee uu xalay u xirtay Leo Messi Kooxda PSG kama badbaadin inay isaga harto Coupe de France, waxaana markii labada qeybood ee ciyaarta 90-ka daqiiqo gool ay iska dhalin waayeen labada dhinac loo baahday in gool ku laadyo lagu kala saaro.
Rigoorayaashii la qaatayna waxa ay 5-6 guushu ku raacday Kooxda martida ahayd ee Nice oo naadiga ka dhisan caasimadda ayaa lagu reebay wareegga 16-ka Coupe de France.
PSG waxaa labo rigoore ka kala lumiyey Paredes iyo Simons, inkastoo xiddigaha gool ku laadyada u dhaliyey Kooxda caasimadda Faransiiska ka dhisan ay ku jireen Kylian Mbappé iyo Lionel Messi.
SAWIRRO:
Gool FM.