Neymar Jr oo markale ku guuleystay abaal-marinta Samba D’or Award 2021… (Waa kuma xiddiga ugu hanashada badan abaal-marintan?)

(Paris) 02 Feb 2022. Waxaa la shaciyey ciyaaryahanka ku guuleystay abaal-marinta Samba D’or 2021 ama Samba Gold Award 2021 oo la guddoonsiiyo laacibka ugu fiican reer Brazil ee ka xamaasha horyaallada Yurub.

Laacibka Kooxda PSG iyo xulka Brazil ee Neymar Jr ayaa sanadkiisii labaad oo xiriir ah ku guuleystay abaal-marintan Samba D’or oo uu horay ugu soo guuleystay sanadkii 2020, sidoo kale markale ayaa loo gacan geliyey abaal-marintan 2021.

Weeraryahanka reer Brazil ee Neymar ayaa haatan ah xiddiga ugu hanashada badan abaal-marintan Samba D’or ama Samba Gold oo la siiyo ciyaaryahanka ugu fiican sanadka xiddigaha reer Brazil ee ka ciyaara meel ka baxsan dalkooda.

Neymar oo abaal-marintan Samba Gold oo ay soo qabanqaabisay Sambafoot horay ugu guuleystay sanadihii 2014, 2015, 2017 iyo 2020 ayaa markale markiisii shanaad ku darsaday sanadkan, waana ciyaaryahanka ugu nashada badan abaal-marintan tan iyo markii bixinteeda la bilaabay sanadkii 2008.

Neymar ayaa dhaliyey 17 gool waxaana uu sameeyey 17 caawin 46 kulan oo uu saftay sanadkii 2021, inkastoo weeraryahankan uu kaliya ku guuleystay sanadkii hore the Coupe de France, laakiin waxa uu kooxdiisa PSG geeyey afar dhammaadka Champions League.

Weeraryahanka PSG ayaa kaalin fiican u galay xiddigaha reer Brazil marka laga hadlayo abaal-marinnada ugu waa weyn ee shaqsiyeed sanadka, waxaana uu kaalinta 16-aad ka galay tartanka abaal-marinta Ballon d’Or, halka uu booska 10-aad ka soo muuqday tartanka abaal-marinta FIFA The Best.

Neymar ayaan ciyaarin tan dhammaadkii bishii November, waxaana uuu ku jiraa heerkii ugu dambeeyey ee soo kabashadiisa dhaawac canqowga bidix ka gaaray, iyadoo laga yaabo inuu garoomada dib ugu soo laabo kulanka ay wajahayaan Real Madrid 15-ka bishan Febraayo ee lugta hore wareegga 16-ka Champions League.

 

View this post on Instagram

 

A post shared by NJ (@neymarjr)

Xiddiga labaad ee tirada ugu badan ku guuleystay abaal-marintan Samba D’or waa Thiago Silva oo haatan ka tirsan Chelsea, kaasoo abaal-marintan hantiyey saddex sano oo kala duwan balse isku xigay kuwaasoo kala ahaa 2011, 2012 iyo 2013 oo uu kala qaaday isagoo u kala ciyaarayay kooxaha AC Milan iyo Paris Saint-Germain.

Gool FM.