(Paris) 22 Feb 2022. Macallinka kooxda Paris Saint-Germain ee Mauricio Pochettino ayaa si aad ah loola xiriirinayaa inuu ka tagi doono kooxdiisa xagaagan maadaama uu xiiso ka helayo kooxo waaweyn oo ka dhisan qaaradda Yurub sida Manchester United iyo naadiga haatan kusoo biirtay doonistiisa ee Real Madrid.
Sida laga soo xigtay Daily Mail, Madrid ayaa diyaar u ah inay Man United kula dagaallanto loollanka loogu jiro ka faa’ideysiga khibradda macallinka reer Argentina.
Kooxda reer Spain ayaa shaki weyn ka qabta mustaqbalka macallinkeeda Carlo Ancelotti kaasoo ay ka cabsi qabto inuu go’aansado ka huleelidda garoonka Santiago Bernabeu inkastoo uu haatan ka caawinayo Los Blancos inay hoggaanka u heyso horyaalka La Liga isla markaana ay u cadcaddahay hanashadiisa.
Si kastaba ha ahaatee, madaxweynaha Real Madrid ee Florentino Perez ayaa la filayaa inuu soo celiyo xiisaha uu qabo Pochettino haddii uu macallinka Taliyaaniga ah ee haatan majaraha u haya hoggaamiyeyaasha horyaalka Spain uu go’aansado inuu tago.
Gool FM.