(Paris) 26 Feb 2022. Kooxda kubadda cagta Paris Saint-Germain ee ka dhisan caasimadda Waddanka Faransiiska ayaa la soo warinayaa inay u dhaqaaqayso soo xero-gelinta xiddiga Chelsea ee N’Golo Kante.
Haddaba su’aasha isweydiinta mudan ayaa ah miyuu xiddiga kooxda Chelsea ee N’Golo Kante dib ugu laaban doonaa dalkiisa hooyo.?
Jariiradda The Telegraph ayaa warinaysa in Paris Saint-Germain ay gacanta ku dhigi karto suuqa xagaaga xiddiga naadiga Chelsea ee N’Golo Kante, kaasoo ay aad u doonayaan saxiixiisa.
Laacibkan khadka dhexe, kaasoo Blues kaga soo biiray Leicester City kaddib markii uu kooxda Foxes ka caawiyey inay hantaan horyaalka Premier League ayaa dhammaystiri kara inuu ku guuleysto koobab waa weyn oo maxalli ah iyo koobka horyaallada Yurub haddii uu habeen dambe ku guuleysto tartanka Carabao Cup oo ay final-kiisa la ciyaari doonaan Liverpool.
Maadaama uu yahay xiddig guulo u saaxiib ah oo koobab waa weyn haysta, layaab ma leh markaas in kooxda ka dheesha horyaalka Ligue 1 ay soo bandhigto rabitaankeeda ku aaddan inay dalkiisa keenaan, iyadoo ciyaaryahanka uu yahay geesi qaran kaddib markii uu qeyb ka qaatay guushii xulka France ee Koobkii Adduunka ee 2018.
Gool FM.