(Paris) 08 Maarso 2022. Weeraryahanka naadiga kubadda cagta Manchester United ee Marcus Rashford ayaa bartilmaameed u ah kooxda Paris Saint-Germain sida ay warineyso warbaahinta dalka Ingiriiska.
Kaddib markii uu la kulmay kalsooni darro kaga timid macallinkiisa Ralf Rangnick kaasoo aanan siinin waqti ciyaareed ku filan, Rashford ayaa gadood ka ah xaaladda kooxdiisa isagoo haatan doonaya inuu ka hayaamo kooxda uu ku barbaaray ee Man United.
Sida laga soo xigtay wargeyska Daily Mail, PSG ayaa isku diyaarineysa inay wada-xaajood la sameyso wakiillada weeraryahanka xulka qaranka England si ay xagaagan gacanta ugu dhigto iyadoo wararku qaar ay sheegayaan inay loollan kala kulmi doonto kooxaha Arsenal, West Ham United iyo Newcastle United.
PSG ayaa dooneysa inay gacanta kusoo dhigto 24-sano jirka marka la gaaro suuqa kala iibsiga xagaagan si ay baddel ugaga dhigto weeraryahankeeda Kylian Mbappe kaasoo qandaraaskiisu dhici doono dhammaadka xilli ciyaareedkan sidaas darteedna bilaash ku tagi kara.
Gool FM.