(Barcelona) 08 Maarso 2022. Madaxweynaha kooxda kubadda cagta Barcelona ee Joan Laporta ayaa markale ku celiyay inuu ku qanacsan yahay isla markaana uusan shallaay ka qabin go’aankii ay kooxdiisa ku fasaxday Lionel Messi xagaagii lasoo dhaafay.
Dhaqaale xumi jirtay bilawgii xilli ciyaareedkan awgeed, Barca ayaa awoodi weysay inay qandaraas cusub ku abaal-mariso halyeygeeda Messi taasoo keentay inuu bilaash ugu biiro kooxda Paris Saint-Germain, waxaana uu Laporta haatan qabaa inay kooxdiisa fursad siisay da’yarro dhowr ah kuwaasoo la’aanta kabtankeedii hore bidhaamay.
“Bixitaankii Messi? waxa uu ahaa go’aankii ugu adkaa ee aan qaato, ma aanan dooneyn inaan go’aankaas qaato, Messi waa ciyaaryahanka ugu wanaagsan taariikhda, balse xaaladdeena ayaa sidaas ahayd” ayuu madaxweynaha Barcelon u sheegay Barca TV+.
“Waxay ahayd inaan go’aan ka qaato arrinta Messi, mana ka qoomameynayo haatan, waayo ma jirto cid kooxda ka sarreysa, intii uu Messi nala joogay xaqiiqada ayaa runta na tustay wax kalena ma jiraan, Barcelona taariikhdeeda weli way sii socotaa, shaqo adag iyo go’aan saxan ayaana nagu soo celin kara dhabbaha guusha, waana sida aan hadda sameyneyno” ayuu hadalkiisa kusii daray Laporta.
Gool FM.