(Dortmund) 09 Mar 2022. Kooxaha kubadda cagta Paris Saint-Germain iyo Chelsea ayaa lagu soo warramayaa inay si aad ah u xiiseynayaan saxiixa xiddiga kooxda kubadda cagta Machester City garabka uga ciyaara ee Riyad Mahrez.
31-sano jirkan ayaa ku jira qaab ciyaareed aad u wanaagsan isagoo kooxda Citizens u dhaliyay 21 gool misena caawiyay toddobo kale kaddib 33 kulan oo uu saftay tartammada oo dhan xilli ciyaareedkan.
Hillinka Faransiiska kasoo baxa ee Foot Mercato ayaa baahiyay inay kooxda PSG u aragto Mahrez baddelka sida saxda ah ugu habboon booska Angel Di Maria kaasoo qandaraaskiisu dhici doono xagaagan.
Si kastaba ha ahaatee, kooxda reer France ayaa loollan adag kala kulmeysa Blues iyadoo Macallin Thomas Tuchel naadigiisa ay si dhow ula socoto xaaladda laacibka reer Algeria kaasoo qandaraaskiisu ay ka harsan yihiin wax ka yar 18 bilood xilli aysan wali Man City wada-xaajood heshiis kordhineed la sameyn laacibkii hore ee kooxda Leicester City kaasoo xagaagan lagu heli karo 30 milyan oo gini.
Gool FM.