(Paris) 17 Abriil 2022. Xiddiga khadka dhexe uga ciyaara kooxda PSG ee Idrissa Gueye ayaa shaaca ka qaaday in Lionel Messi uu yahay dhammaystiraha ugu fiican kooxda, halka Neymar Jr uu yahay kan ugu awoodda badan dhanka goysmada.
Parisians-ka waxay heystaan saf xoog badan oo ay ka buuxaan ciyaartoy heer caalami ah, inkastoo aysan had iyo jeer u wanaagsanayn hal beeg ahaan xilli ciyaareedkan.
Messi oo u soo wareegay kooxda sanadkii hore ayaa markii hore dhibtoonayay kaddib markii uu in ka badan 10 sano ku qaatay garoonka Camp Nou, si kastaba ha ahaatee xiddiga reer Argentine ayaa si tartiib tartiib ah ula qabsanaya qaab ciyaareedka cusub ee Kooxdiisa PSG.
Dhanka kale Neymar Jr ayaa wakhti wacan qaatay waayihiisii Paris tan iyo markii uu kooxda ku soo biiray sanadkii 2017-kii, waana mid ka mid ah ciyaartoyda ugu fiican adduunka dhanka gambiska ama goysmada.
Mar la weydiiyay dhammaystiraha ugu fiican iyo kan ugu goysmada ee Kooxda PSG Gueye wuxuu yiri:-
“Dhamaystaha ugu fiican? waa Messi! waa mid cajiib ah; iskama laado kubadda ee gool ayuu ku dhaafaa.
“Midka ugu farsamada badan iyo kan ugu goysmada fiican? waa Neymar, aad iyo aad buu u xoog badan yahay! Kubadda lugtiisa ku jira haddii uu doono cid ka qaadi kartaa ma jirto!”.
Gool FM.