(Paris) 02 Juun 2022. Wargeyska Jarmalka ka soo baxa ee Bild ayaa sheegay in maamulka kooxda Paris Saint-Germain ay qorsheynayaan inay la soo saxiixdaan ciyaaryahanka reer Senegal ee Sadio Mane inta lagu guda jiro suuqa kala iibsiga xagaagan.
Magaca Sadio Mane, oo 30 jir ah, ayaa lala xiriirinayaa inuu ka tagayo naadiga Liverpool xagaagan, kaddib wareysi uu bixiyay oo albaabka u furay bixitaankiisa.
Bayern Munich ayaa ugu cad cad inay ku guuleysato saxiixa Sadio Mane, kaddib markii wargaysyada Germany iyo England ay xaqiijiyeen arintan xilli hore.
Wargayska ayaa tilmaamay in inkasta oo ay Bayern Munich xiriir la samaysay xiddiga reer Senegal, haddana Paris Saint-Germain ayaa si xooggansoo gashay tartanka loogu jiro saxiixa Sadio Mane.
Wargayska ayaa intaa ku daray in kooxda difaacanaysa horyaalka France ay diyaar u tahay in ay lacag badan ku bixiso saxiixa xiddiga reer Senegal ee Sadio Mane kaas oo loo arko mid ka mid ah tiirarka ugu muhiimsan ee weerarka kooxda Liverpool mudada dheer.
Wargayska ayaana tilmaamay in Sadio Mane uusan wali qaadan go’aankiisa kama damebysta ah, balse waxaa la xaqiijinayaa in uu xagaagan isaga tagi doono kooxda Liverpool.
Waxaa xusid mudan in Sadio Mane qandaraaskiisa Liverpool uu dhacayo xagaaga sanadka soo socda.
Gool FM.