(Yurub) 14 Juun 2022. Kooxda reer Jarmal ee RB Leipzig ayaa dejisay qiimaha ay ku iibineyso xiddigeeda reer France ee Christopher Nkunku, oo bar-tilmaameed u ah kooxaha Real Madrid iyo Manchester United.
Sida laga soo xigtay warbixin uu daabacay wargeyska Daily Mail ee dalka England, maamulka kooxda Jarmalka ah ee RB Leipzig ayaa go’aamisay in qiimo dhan 100 million pounds ay ku iibineyso laacibkeeda Christopher Nkunku.
Warbixinta ayaa lagu sheegay in saxiixa Nkunku ay ku tartamayaan kooxaha ugu waa weyn horyaalka Premier League ee Manchester United, Arsenal iyo Liverpool, waxaana sidoo kale lala xiriiriyay inuu u dhaqaaqi karo kooxdiisii hore ee Paris Saint-Germain.
Wararka ayaa waxay sidoo kale xaqiijinayaan in xiisihii Liverpool ee Nkunku la soo afjari doono kaddib markii ay la soo wareegeen weeraryahanka reer Uruguay Darwin Núñez oo ay kala soo wareegeen kooxda reer Portugal ee Benfica.
Sidoo kale wargeyska ayaa sheegay in guuldaradii heshiiska Darwin Núñez ee Manchester United ay la macno tahay in kooxdu ay si xoogan ugu tartami doonto saxiixa Nkunku.
Nkunku oo 24 jir ah, ayaa u soo dhaqaaqay RB Leipzig sanadkii 2019, isagoo ka yimid Paris Saint-Germain, wixii markaas ka dambeeyay wuxuu u ciyaaray 134 kulan, isagoo dhaliyay 47 gool, wuxuuna caawiyey 46 gool.
Gool FM.