(Paris) 14 Feb 2018 PSG ayaa caawa u martin doonta kooxda Real Madrid, kulankaas oo ah kan ugu xiisaha badan kulamada wareega 16-ka ee koobka horyaalada yurub.
Maanta waxay ku beegantahay 14-ka February waana maalin adduunka ugu astaysan in la xuso jacaylka, laakiin maalintaan waa maalin u wanaagsan PSG.
14-Feb-2017, PSG ayaa garoonkeeda ku marti qaaday kooxda Barcelona, waxayna uga adkaatay 4-0, iyada oo goolasha ka heshay Cavani, Di Maria oo 2-gool dhaliyay iyo Draxler.
Sanad kadib kooxda reer France ayaa caawa u martin doonta Real Madrid, xili niyad ahaan ay ka fiicantahay kooxda tababare Zidane oo ku jirta xiliciyaareed liita.
Taageerayaasha PSG ayaa si wacan ugu dabaal dagay maalinta jacaylka adduunka sanadkii hore, laakiin su’aasha ayaa ah ciyaartoyda kooxdu markale fursadaas oo kale ma siin doonaan taageerayaasha sanad kadib?.
PSG ayaa ka duwan sidii ay ahayd sanad ka hor, waxayna weerarkeeda ku soo lamaanisay Neymar iyo Mbappe oo qiimo qaali ah ugu fadhiya kooxda.
Gool FM