(Paris) 01 Maarso 2018 Kooxda PSG ee dalka France ayaa xalay xaqiijisay in Neymar uu mari doono qaliin kadib dhaawicii soo gaaray horaantii isbuucaan.
Bayaan ka soo baxay kooxda PSG ayaa lagu sheegay in iyaga iyo xiriirka kubadda cagta Brazil ay isla gaareen go’aan ah in la qalo Neymar dhamaadka todobaadkaan.
“Kaddib saddex maalin oo daweyn hore lagu sameeyey oo ku tacaluqday daawo borotokool ahaan xadidneyn, go’aan wadajir ah waxaa gaaray kooxda caafimaadka, Paris Saint – Germain iyo xulka qaranka Brazil” ayaa lagu yiri bayaankii ka soo baxay PSG.
“Iyada oo lala tashaday ciyaaryahanka, waxaa la go’aansaday in Neymar Jr qalliin loogu sameeyo Brazil dhammaadka toddobaadkan.
“Waxaa qali doonaa Dr. Rodrigo Lasmar, oo uu wehelin doono Professor Sailant oo matalaya PSG.”
Neymar ayaa kadib ku soo hadlay baraha bulshada isaga oo soo muujiyay inuusan ka niyad jabayn sidii uu dib ugu soo laaban lahaa garoomada, wuxuuna yiri:
“Waxaa haboon in caqabad aysan hortaada istaagin, haddii aad hortaada ka aragto darbi ha is dhiibin ee baro sidii aad u fuuli lahayd”.
Gool FM