(Paris) 24 Abriil 2016 – Paris Saint-Germain ayaa ku guuleysatay French League Cup, kaddib markii ay 2-1 uga adkaadeen naadiga Lille, Flop-kii hore ee Manchester United Angel Di Maria ayaa koobkan ku hoggaamiyey kooxda ka dhisan Paris, kulankaas oo ka dhacay garoonka Stade de France.
Kooxda haysata horyaalka Ligue 1 ayaa hoggaanka u qabatay ciyaarta oo ay qeybta hore ka harsan tahay shan daqiiqo, waxaana u dhaliyey goolka daah furka Javier Pastore.
Laakiin kooxda Lille ayaa ka soo laabatay goolkaas lagu hoggaamiyey qeybtii dambe, kaddib markii uu bulusoon (free-kick) uga barbareeyey xiddiga Djibril Sidibe, ciyaarta ayaana markaas noqotay barbaro 1-1.
Faloobkii hore ee Manchester United Angel Di Maria ayaa ugu dambayn kooxdiisa PSG goolka guusha u dhaliyey ciyaarta oo ay ka harsan tahay 16-daqiiqo, waxaana uu ahaa goolkiisii 15-aad ee xilli ciyaareedkan.
Wiilasha tababare Laurent Blanc ayaa sidaas ugu guuleystay koobka French League Cup, waana koobkoodii labaad ee ay hantaan xilli ciyaareedkan, iyagoo horay meel u dhigay koobka horyaalka ee Lique 1, waxaana ay doonayaa inay xilli ciyaareedkan ku guleystaan saddexleey koobabka dalkooda laga dhigo.
SAWIRRO:
Gool FM.