(Paris) 20 Maajo 2018 Milkiilaha kooxda PSG ee Nasser Al-Khelaifi ayaa amaanay goolhayaha ka tagay Juventus ee Buffon kaas oo lala xiriirinayo kooxda reer France.
Shalay ayaa la baahiyay in PSG ay soo hordhigtay Buffon dalab dhan 2-sano oo sanadkii uu ku qaadanayo mushaar gaaraya 7-milyan oo euro.
Sidoo kale dalabka la soo hordhigay waxaa ku jira inuu noqonayo safiirka PSG ee koobka adduunka ee 2022 lagu qabanayo Qatar.
“Buffon waa goolhaye cajiib ah, laakiin dooqeena koowaad ee dhanka goolhayaha waa Areola, isaga ayaana sii ahaanaya goolhayaheena xiliciyaareedka dambe” ayuu yiri Nasser Al-Khelaifi.
Waxaa la waydiiyay in kooxdiisu ay doonayso saxiixa Buffon, wuxuuna ku jawaabay:
“Si fiican ayaad ii garanaysaan, dhab ahaantii ma waxaad iga sugaysaan inaan idiin sheego ciyaartoyda aan doonayno? Buffon waa goolhaye wayn, wuxuuna leeyahay shaqsiyad cajiib ah, waxaan rumaysanahay in koox walba ay jeceshahay saxiixiisa”.
Gool FM