(Moscow) 28 Juunyo 2018 Ciyaartoyda xulka qaranka France ayaa si wayn afka ugu haaya kabtanka xulka Argentina ee Lionel Messi.
Labada xul ayaa sabtiga isku fara saaraya wareega 16-ka ee koobka adduunka kadib markii ay ka soo gudbeen wareega guruubyada.
Goolhayaha xulka qaranka France ee Steve Mandanda ayaa ka hadlay ka hortaga Messi, wuxuuna yiri:
“Inteena badan waan garanaynaa Messi, waayo ama waan ka hortagnay ama waan ka garab ciyaarnay, waan ognahay inuu awoodo inuu is badal ku sameeyo ciyaarta, wuxuu awoodaa inuu sameeyo wax walba”.
Daafaca kooxda PSG iyo xulka France ee Presnel Kimpembe ayaa isna dhankiisa ka hadlay Messi, wuxuuna yiri:
“Messi waa mid kamid ah ciyaartoyda ugu wanaagsan adduunka, ma aaminsani inuu jiro daafac xal u haaya celinta Lionel Messi”.
“Xalka kaliya ee lagu celin karo waa in loo ciyaaro si wada jir ah, Argentina ma ahan kaliya Messi, waxay haystaan ciyaartoy cajiib ah, wuxuu noqon doonaa kulan adag”.
Gool FM