(PSG) 09 Luulyo 2018. Goolhayihii hore kooxda Juventus Gianluigi Buffon ayaa kasoo muuqday shirkiisa jaraa’id ugu horeeyay ee kooxda Paris Saint-Germain, waxaana ku wehliyay shirka jaraa’id madaxweynaha kooxda PSG Nasser Al-Khelaifi, si looga hadlo heshiiskiisa iyo arimo kale ee badan.
madaxweynaha kooxda PSG Nasser Al-Khelaifi ayaa daah furay shirka jaraa’id loogu soo bandhigayay goolhaayaha ugu fiican aduunka saxaafada markii ugu horeesay, wuxuuna xaqiijiyay in sababta ugu weyn ay ula soo saxiixdeen Gianluigi Buffon ay tahay inay ku guuleystaan koobab, gaar ahaan tartanka Champions League.
Kadib waxaa hadalka la wareega goolhaayihii hore kooxda Juventus iyo xulka qaranka Talyaaniga Gianluigi Buffon wuxuuna ka hadlay dareenkiisa ku aadan imaatinka PSG.
“Waxaan weli dareensanahay inaan awoodi karo inaan sii joogo meel kale si aan u soo bandhigo awoodeyda ciyaareed, waxay arintan faa’iido u tahay ciyaaryahan ahaan iyo sidoo kale shaqsiyadeeda”.
“Waa hubaal in Champions League uu noqon doono bar-tilmaameedka koowaad, dhab ahaan cid kasta ee ku sugan kooxda waxay ku fikireysaa in ay wax walba soo bandhigto sababa la xidhiidha jamaahiirtan quruxda badan”.
“Waxaan sidoo kale doonayaa inaan cadeeyo inaan weli ahay goolhaye weyn ee aad u wanaagsan”.
Gool FM.