(PSG) 14 Agoosto 2018. Paris St Germain ayaa qorsheyneysa inay lasoo saxiixato khadka dhexe kooxda Tottenham Hotspur ee Christian Eriksen inta uu furan yahay suuqan xagaaga.
26 jirkan ayaa ka mid ah xidigaha ugu muhiimsanaa ee sanooyinkii lasoo dhaafay ku suganaa kooxda Tottenham Hotspur, xili sidoo kale uu qeyb ka yahay xidigaha ugu fiican 5-ta horyaal ugu waaweyn ee qaarada yurub.
Wargeyska “Express” ee dalka England ayaa wuxuu shaaca ka qaaday in maamulka kooxda PSG ay si aad ah u xiiseenayaan inay lasoo saxiixdaan Christian Eriksen, kahor inta uusan xirmin suuqan xagaaga.
Macalinka reer Germany ee kooxda Paris St Germain Thomas Tuchel ayaa si aad ah ula dhacsan qaab ciyaareedka Christian Eriksen, wuxuuna ka dalbaday maamulka kooxda inay sameeyaan saxiixiisa.
Wararka ayaa waxay intaas kusii darayaan in PSG ay si dhaqsi leh ugu dhaqaaqday saxiixa laacibkan, waxayna miiska u saareen Tottenham Hotspur aduun dhan 100 million pounds, si kaliya ay u helaan saxiixa Christian Eriksen.
Maamulka kooxda Tottenham Hotspur ayaa la rumeysan yahay inay tixgelin doonaan dalabka Paris Saint-Germain, ka dibna go’aan kama dambeys ah ay gaari doonaan, inay ogolaadaan ama inay diidaan.
Gool FM.