(Madrid) 22 Agoosto 2018 Real Madrid ayaa la filayaa inay saxiix wayn ku soo afjari doonto suuqa kala iibsiga ee xaggaagan oo maalmo kooban ay ka harsan tahay.
Idaacada Onda Cero ayaa baahisay in Neymar ama Kylian Mbappe midkood uu xiran doono funaanada Real Madrid inta uusan xirmin suuqa kala iibsiga ee xaggaagan.
Khamiista ayaa la filayaa in UEFA ay ganaax ku rido kooxda PSG haddii ay jabisay sharciga dhaqaale wanaaga kooxaha yurub.
Tilaabada hore ayaa ah in UEFA ay ku qasabto PSG inay iska iibiso labadaan laacib midkood, Real Madrid ayaana soo cusboonaysiin karta wadahadaladii hore ee ay ku doonaysay Neymar taas oo waqti hore lagu heshiiyay.
Tilaabada labaad ayaa ah in UEFA ay suuqa oo idil ka ganaaxdo PSG taas oo ka dhigaysa kooxda reer France inaysan heshiis rasmi ah u badali karin heshiiska amaahda ah ee Kylian Mbappe uu kula joogo ka hor 27-da bishaan.
Xaaladaan dambe haddii ay dhacdo Mbappe wuxuu dib ugu laabanayaa kooxdiisii hore taas oo u fududaynaysa Real Madrid inay wadahadal la furto Monaco si ay u hesho saxiixa Kylian Mbappe.
Haddii ganaaxa UEFA uu noqdo mid aan lagu xusin labadaas qodob ee aan soo sheegnay uma fududaan doonto Real Madrid inay la wareegto labadaan laacib midkoodna.
Gool FM