(Paris) 31 Agoosto 2019. Agaasimaha ciyaaraha kooxda PSG ee Leonardo Araújo ayaa ka baxay aamuusnaanta wuxuuna ka hadlay wararka Neymar Jr la xiriirinayo inuu ku biirayo Barcelona kahor inta uusan xirmin suuqan xagaaga.
Leonardo ayaa kaddib guushii ay xalay kooxda Paris Saint-Germain 2-0 kaga gaartay dhigeeda Metz horyaalka FRANCE – LIGUE 1 wuxuu warbaahinta kala hadlay kiiska Neymar Jr:
“Ma jirin wax heshiis ah oo aan la gaarnay kooxda Barcelona ee ku aadan Neymar Jr, go’aankeena xili kasta wuxuu ahaa mid cad, way garteen waxaan dooneynay”.
“Waxaan gaarnay dalabka koowaad 27-kii Agoosto, 5 maalmood kahor xiritaanka suuqa kala iibsiga ee xagaaga, waxaan u furnay inaan ka hadalno ciyaartoyda kale oo heshiiska ku jira, hadda waxaa suuqa ka harsan 3 maalmood”.
“Waxaa la tilmaamay in kooxo badan ay xiiseenayaan inay la saxiixdaan Neymar Jr tan iyo bilowga suuqa kala iibsiga, laakiin Barcelona waa kooxda kaliya ee dalab kasoo gudbisay Neymar, Wey adag tahay in Dembele loo sheego inuu baxo 27-ka Agoosto”.
“Neymar Jr waa ciyaaryahan aan caadi aheyn. Waa shaqsi fiican, wuxuu ku noolaa waxyaabo badan xagaagan, ciyaartoy isaga oo kale ah had iyo jeer waa muhiim, waxay noqon doontaa xilli adag, wali waa inaan xalinaa waxyaabo badan, hamigeenuna aad ayuu u sarreeyaa”.
Gool FM.