(Europe) 24 Okt 2019. Halyeeyga reer Brazil ee Rivaldo ayaa la taliyay da’ayarka reer France ee Kylian Mbappé inuu ka tago kooxda Paris Saint-Germain si uu ugu biiro horyaalada Premier League ama La Liga, hadii uu runtii doonayo inuu noqdo bedelka Cristiano Ronaldo iyo Lionel Messi.
Kylian Mbappé ayaa ugu dhaqaaqay Paris St Germain xagaagii 2017 qaab ahaam oo hal xilli ciyaareed ah, balse heshiiska ayaa waxay kooxda PSG ugu dambeyntii ku dhameystiray qiimo dhan 180 milyan euro oo ay kaga soo qaadatay gabi ahaanba naadiga Monaco.
Rivaldo ayaa wareysi uu bixiyay wuxuu kula taliyay Kylian Mbappé wuxuuna yiri:
“Shaki la’aan Mbappé wuxuu leeyahay awood uu ku noqdo mid ka mid ah ciyaartooyda ugu fiican adduunka, waa ciyaaryahan soo bandhiga kubadda cagta ee aad u fiican, isla markaana leh awood cajiib ah”.
“Mbappe wuxuu awoodi doonaa inuu horumariyo tayadiisa haddii uu ka ciyaaro horyaalka Premier League ama La Liga, sababtoo ah horyaalka Faransiiska wuxuu ka yaryahan kan Spain iyo Ingiriiska”.
“Anigoo ixtiraamaya kooxda Paris Saint-Germain, waxay ila tahay inay haboon tahay in Mbappé uu ku biiro Spain ama Ingiriiska, si uu u noqdo bedelka Messi iyo Ronaldo, sababtoo ah ciyaartooyda ugu fiican marwalba waxay u baahan yihiin inay ku guuleystaan horyaalada yurub ugu fiican”.
“Laakiin waxaan u maleynayaa inay ku adkaan doonto Barcelona inay la soo wareegaan isaga, marka la fiiriyo qiimahiisa, maxaa yeelay Barca waxay ku guuldarreysatay inay la soo saxiixato Neymar Jr xagaagii lasoo dhaafay, markaa aan ka fikirno qiimaha ku bixi kara saxiixa Mbappé, sidaas darteed macquul ma noqoneyso in ciyaaryahanka uu ku biiro kooxda reer Catalonia xilligan”.
Gool FM.