(Yurub) 09 Sebt 2020. Cristiano Ronaldo ayaa xalay dhaafay goolkiisii 100-aad ee xulka qaranka Portugal, kaddib markii uu labo gool dhaliyey kulankii ay ka horjeedeen xulka Sweden.
CR7 ayaa haatan bartilmaameed ka dhiganaya rikoorka gooldhalinta heerka caalami ee Ali Daei, kaasoo u dhaliyay xulkiisa Iran 109 gool, xilli Ronaldo uu xalay dhaliyey goolkiisii 100-aad iyo kiisii 101-aad ee xulka Porugal.
Xulka qaranka Portugal ayaa guul kaga gaaray dhigooda Sweden 0-2, kulankooda labaad ee tartanka UEFA Nations League, Cristiano Ronaldo oo dhaliyay labada gool ayaana gaaray goolkiisii 101-aad ee xulkiisa qaranka Portugal.
Haddaba weeraryahanka Kooxda Juventus ayaa gooldhalin ku ceebeystay xiddigaha halyeeyada ah ee Thierry Henry iyo Robin van Persie.
Cristiano Ronaldo ayaa dhaliyey 101 gool oo xulka Portugal ah, waana in la mid ah goolasha ay wadar ahaan xulalkooda u dhaliyeen Thierry Henry iyo Robin van Persie.
Halyeyga reer France ee Thierry Henry ayaa xulkiisa u dhaliyey 51 gool, halka laacibka reer Holland ee Robin van Persie uu xulkiisa Orange u dhaliyey 50-gool.
Thierry Henry iyo Robin van Persie marka ay la isku daro goolasha ay u dhaliyeen xulalkooda, waa 101 gool, halka CR7 kaligiis uu xulkiisa Porugal u dhaliyey 101-gool.
Gool FM.