(Barcelona) 28 Dis 2020. Xiddiga kooxda Barcelona ee Lionel Messi ayaa shaaca ka qaaday fikirkiisa ku aadan suurtagalnimada uu Neymar Jr ugu soo laaban karo garoonka Camp Nou, iyo in ay taasi saamayn ku yeelan doonto go, aankiisa ah in uu ka tago xagaaga dambe.
Lionel Messi ayaa ka soo muuqday wareysi dheer oo uu siiyay kanaalka reer Spain ee “Lasix” si uu aga hadlo mustaqbalkiisa kooxda Barcelona iyo sidoo kale arrimo muhiimka ah ee quseeya noloshiisa.
Lionel Messi oo ka hadlayay suurtagalnimada uu Neymar Jr ugu soo laaban karo garoonka Camp Nou ayaa wuxuu yiri:
“Waxaan ka wada hadalnay Neymar Jr kulankeena Champions League, aniga iyo isaga ma dooneyno inaan iska hor nimaadno, xitaa ma doonayaan inay wajahaan kooxda Barcelona in kastoo aan mareyno xaallad adag.”
“Waxaan maalin walba la hadlaa Suarez iyo Neymar, waxaan ku wada xiriirnaa group WhatsApp-ka ah, wax badan ayaan kahadalnaa, wixii ugu dambeeyay ee aan kahadalnay ayaa ah in isku aadkii aan aan ku aadnay iyaga wareega 16-ka Champions League.”
Mar wax laga weydiiyay suurtagalnimada uu Neymar Jr dib ugu soo laaban karo kooxda Barcelona ayaa wuxuu ku jawaabay Lionel Messi:
“La soo saxiixashada Neymar waxay noqon doontaa mid aad u adag, sababtoo ah lacag kuma heysano kooxda, wayna adkaan doontaa inaan la soo saxiixano ciyaartoy marka la eego xaaladdan adag ee dhaqaale.”
“Waxaa jira taageerayaal badan oo Barca ah oo i jecel isla markaana doonaya inaan sii joogo, dhanka kale, waxaa jira dad aan u fikireynin si isku mid ah sababa la xiriira wax walba oo dhowaan dhacay, waqtigan xaadirka ah ma jiro wax go’aan ah, laakiin waan qaadan doonaa waxa walba oo qalbigayga iyo maskaxdaydu amrayaan waqtiga go’aanka.”
“Markaan ciyaaraha ka fariisto, waxaan doonayaa inaan sii joogo Barcelona, laakiin ma ahan tababare ahaan, waxaan doonayaa inaan noqdo agaasime isboorti, si aan ula soo saxiixdo ciyaartoyda aan doonayo.”
Gool FM.