(Manchester) 09 Agoosto 2021. Wargeyska “Daily Express” ee dalka England ayaa wuxuu shaaca ka qaaday in Manchester United ay si weyn uga faa’iidaysan doonto u dhaqaaqista Lionel Messi ee kooxda Paris Saint-Germain, sida la filayo saacadaha soo socda.
Paris Saint-Germain ayaa isku diyaarineysa inay heshiis xor ah kula saxiixato Leo Messi, kaddib markii uu si rasmi ah uga tagay Barcelona sababo la xiriira inuu dhammaaday qandaraaskiisa, wuxuuna noqon doonaa heshiiskii Lixaad ay soo gabagabeyn doonto PSG, inta lagu guda jiro suuqan kala iibsiga ee xagaaga.
Wargeyska ayaa wuxuu warbixitiisa ku tilmaamay in Manchester United ay wali raadineyso inay xoojiso safkeeda, kaddib markii ay la saxiixatay xiddigaha Raphaël Varane iyo Jadon Sancho, waxayna hadda dooneysaa inay sameyso saxiixa khad dhexe ee cusub, oo awood u leh inuu fuliyo howlaha uu codsanayo tababare Ole Gunnar Solskjær.
Wararka ayaa waxay intaas ku sii darayaan in Manchester United ay hadda u dhaqaaqi doonto saxiixa xiddiga kooxda Rennais ee Eduardo Camavinga, maadaama ay Paris Saint-Germain oo dooneysay saxiixiisa aysan awoodi doonin sababa la xiriiro arimo dhaqaale awgood, kaddib markii ay la saxiixatay Lionel Messi.
Waxaa jira saddex kooxood oo doonayay inay la saxiixdaan Camavinga, kuwaas oo kala ah Real Madrid, Paris Saint-Germain iyo Manchester United, laakiin Los Blancos ayaa goor hore go’aansatay inay ka baxdo heshiiska sababo la xiriira dhibaatada dhaqaale ee haysata, halka PSG aysan awoodi Karin inay sameyso heshiis cusub, kaddib heshiisyadii badnaa ay soo gabagabeysay, sidaas darteed naadiga Red Devils ay noqotay kaliya ee tartanka ku soo hartay.
Wargeyska “Daily Express” ayaa xaqiijiyay in Manchester United ay ku dhowdahay inay la saxiixato Eduardo Camavinga, gaar ahaan maadaama ciyaaryahanka uu doorbiday inuu u dhaqaaqo garoonka Old Trafford.
Gool FM.