(London) 29 Okt 2021. Ciyaaryahankii hore kooxda Chelsea ee Cesc Fabregas ayaa ogaaday dhibaatada haysata xiddiga reer Germany ee Timo Werner kaas oo aan wali gaarin heer uu ku qanciyo taageerayaasha Blues.
Timo Werner waxa uu Blues kaga soo biiray kooxda RB Leipzig sannadkii 2020 kaddib bandhigiisii wacnaa ee horyaalka Bundesliga, tan iyo markaas waxa uu kala qaybqaatay Chelsea 62 kulan uu u saftay tartammada oo dhan, isagoo u dhaliyay 14 gool, wuxuuna sidoo kale ka caawiyay 16 gool saaxiibadiis.
Fabregas ayaa bartiisa Twitter-ka ku soo qoray dhawaan wax ku saabsan Werner, waxaana daabacay wargeyska Daily Mail ee dalka England
“Timo Werner waxa uu sameynayaa bilow fiican, laakiin mararka qaar asxaabtiisa ma arkaan isaga, ama uma baasaan kubadda isaga, wuxuu u muuqdaa mid xanaaqsan mararka qaarkood.”
Xilli ciyaareedkan, Werner waxa uu Chelsea la ciyaaray 10 kulan oo kaliya tartamada oo dhan, oo ay ku jiraan 7 kulan oo horyaalka ah, kulan Carabao Cup ah, kulan UEFA Super Cup, iyo hal kulan Champions League ah, iyadoo uu dhaliyay 2 gool, wuxuuna sidoo kale caawiyay gool.
Gool FM.