(Paris) 30 Okt 2021. Macallinka Kooxda Paris Saint-Germain ee Mauricio Pochettino ayaa shaaca ka qaaday in sababtii uu u beddelay Lionel Messi kulankii xalay ay guusha soo laabashada ah ka gaareen Lille ay ahayd sabab taxadar awgeed.
Lionel Messi ayaa garoonka laga saaray qeybtii nasashada ee kulankii xalay, waxaana hoggaamiyaha PSG uu haatan shaaca ka qaaday inuu xaalad taxadar awgeed u beddelay Weeraryahanka reer Argentina.
Go’aanka uu ku beddelay Lionel Messi ayay taageerayaashu dood ka keeneen oo ay aad ula yaaabeen, maadaama kooxda gool lagu hoggaaminayey markaas, laakiin kooxda PSG ayaa guul soo laabasho ah gaartay.
Lille ayaa goolka la horreysay waxaana ugu shubay PSG, Jonathan David, laakiin kooxda ka dhisan caasimadda Faransiiska ayaa labo gool la timid qeybtii dambe, iyadoo goolka barbaraha uu u dhaliyey Marquinhos, halka goolka guusha uu dhaliyey Angel di Maria ciyaarta oo ay ka harsan tahay kaliya labo daqiiqo.
Markii la weydiiyey waxa sababay go’aanka uu ku beddelay xiddigii hore ee Kooxda Barcelona ayuu Tababare Pochettino u sheegay Amazon Prime: “Waa inaan sugno, waxaan la hadalnay dhakhtarka, waxaana u beddelay taxaddar awgii.
“Ma uu socon karin, laakiin arrin weyn maaha, waxa uu diyaar u noqon doonaa kulanka soo socda.” ayuu hadalkiisa ku sii daray Macallinka Kooxda PSG.
Gool FM.