(Paris) 16 Nof 2021. Madaxweynaha Paris Saint-Germain ee Nasser Al-Khelaifi ayaa lagu soo warramayaa inuu u soo bandhigay Barcelona fursad ay dib ula soo saxiixan karto Neymar Jr inta lagu guda jiro suuqa kala iibsiga ee xagaaga soo aaddan.
29-sano jirkaan ayaa kaliya heshiis cusub oo waqti dheer ah u saxiixay PSG bishii May, waxaana xiddiga xulka qaranka Brazil heshiiskiisa uu ku joogo caasimadda Faransiiska uu ku eg yahay illaa xagaaga 2025-ka.
Sida uu warinayo Warsidaha El Nacional, Al-Khelaifi ayaa u soo bandhigay Barcelona xiddiga weerarka ka ciyaara iyadoo uu u sii marsiinayo wakiillo, iyadoo kooxaha Premier League qaarkood sidoo kale loo bandhigay.
Warbixinta ayaa intaa ku daraysa in dalab ku kacaya 80 milyan oo euro oo u dhiganta 68.3 milyan oo gini ay u badan tahay inay aqbasho kooxda Mauricio Pochettino, iyadoo kooxda ka dheesha horyaalka Ligue 1 ay dooneyso inay dib u habeyn ku sameyso kooxdeeda xagaaga soo aaddan.
Si kastaba ha ahaatee Barcelona ayaa la rumeysan yahay inay mudnaanta koowaad siineyso u dhaqaaqista Weeraryahanka kooxda Liverpool ee Mohamed Salah, waxaana la warinayaa inaysan ka fikiraynin inay xilligaan Neymar ku soo celiyaan garoonka Camp Nou.
Xiddigan ka soo jeeda Koonfurta Ameerika ayaa horay u matalay kooxda Catalan intii u dhaxeysay 2013 iyo 2017, isagoo dhaliyay 105 gool 186 kulan oo uu saftay, ka hor inta uusan si layaab leh ugu dhaqaaqin Magaalada Paris.
Neymar ayaa ku dhibtoonayay inuu soo bandhigo qaab-ciyaareedkiisa ugu fiican ee heerka kooxeed xilli ciyaareedkan, isagoo kaliya saddex gool dhaliyay, saddex kalena caawiye ka ahaa 11 kulan oo uu saftay tartammada oo dhan.
Gool FM.