(Munich) 30 Nof 2021. Kaddib markii xalay lagu garaacay abaal-marinta Ballon d’Or sanadkan 2021, weeraryahanka Bayern Munich ee Robert Lewandowski ayaa baraha bulshada dareenkiisa kula wadaagay taageerayaashiisa isagoo hambalyo u diray Lionel Messi iyo Alexia Butellas oo ku kala guuleystay abaal-marinta kubadda dahabka dhanka ragga iyo dumarka.
France Football ayaa Messi u magacowday ku guuleystaha abaal-marinta Ballon d’Or sanadkan kaddib markii laacibka Paris Saint-Germain uu helay 613 cod halka Lewandowski oo booska labaad galay isna uu helay 580.
“Hambalyo Leo Messi iyo Alexia Putellas, ku guuleystayaasha Ballon d’Or 2021; sidoo kale hambalyo dhammaan ciyaartoydii sharaxneyd! Waxaan ku guuleystay abaal-marinta Striker of the Year (weeraryahanka sanadka), mana jiro ciyaaryahan abaal-marin shaqsi ah ku guuleysan kara la’aanta koox awood badan iyo taageerayaal daacad ah oo ka dambeeya. Waad ku mahadsantihiin taageeradiina” ayuu Lewandowski ku qoray bartiisa Twitter-ka.
Xiddigaha kala hoggaamiya xulalka Argentina iyo Poland ayaa sidii la filayayba ku dagaallamay abaal-marinta sanadka illaa heerka ugu dambeeya, waxaana u dhexeeyay kaliya farqi 33 dhibcood ah oo uu Messi ku qaaday abaal-marinta Ballon d’Or markiisii todobaad.
Gool FM.