(Milano) 01 Dis 2021. Weeraryahanka reer Sweden iyo kooxda AC Milan ee Zlatan Ibrahimović, ayaa sheegay inuu kula taliyay weeraryahanka Paris Saint-Germain ee Kylian Mbappe iany muhiim tahay inuu ku biiro Real Madrid, isagoo xusay inuu dib uga noqday hadalkii uu sheegay mar dambe, wuxuuna ka codsaday madaxweynaha Paris inuusan iibin.
Magaca Kylian Mbappe ayaa lala xiriirinayay inuu u dhaqaaqayo Real Madrid sanadihii lasoo dhaafay, iyadoo kooxda Real Madrid ay isku dayday inay ku guuleysato inay hesho adeeggiisa dhowr jeer, laakiin maamulka Paris Saint-Germain ayaa diiday dhammaan isku daygii uu sameeyay madaxweynaha Los Blancos ee Florentino Perez.
22-jirka reer France ee Kylian Mbappe qandaraaska uu kula jiro Paris Saint-Germain wuxuu dhacayaa xagaaga soo aadan, wuxuuna xaq u leeyahay inuu koox walba qandaraas la galo inta lagu jiro bisha Janaayo soo aadan, iyada oo beeca xurta ah uu kaga dhaqaaqi doono PSG dhammaadka xiliciyaareedkan.
Wargeyska Corriere dello Sport ee dalka Talyaaniga ayaa wuxuu shaaca ka qaaday wareysi uu bixiyay rug-cadaaga Zlatan Ibrahimović, waxaana hadaladiisa ka mid ahaa:
“Waa run inaan kula taliyay Kylian Mbappe inuu isaga tago Paris Saint-Germain, maadaama uu u baahan yahay jawi habaysan oo la mid ah kan Real Madrid.”
“Laakin markaas waan ka noqday wixii aan u sheegay, waxaana ka codsaday madaxweynaha Paris Saint-Germain inuusan iibin.” Ayuu yiri Zlatan Ibrahimović.
Gool FM.