(Nyon) 15 Dis 2021. Sharikadda qalabka isboortiga ee Adidas ayaa soo bandhigtay kubadda lagu ciyaari doono xeerka bug-baxa ama knockout-ka Champions League.
Koobka horyaallada Yurub ee Champions League ayaa isku aadkiisa wareegga 16-ka kooxood dhowaan la sameeyey, inkastoo labo goor dib loogu celiyey oo isku aadkii hore gabi’ahaanba meesha laga saaray.
Kulammada lugta hore ee wareegga 16-ka ayaa la ciyaari doonaa 15-ka &16-ka Febraayo iyo 22-ka & 23-ka isla bisha Febraayo ee 2022, halka kulammada lugta labaadna la ciyaari doono 8-da & 9-ka Maarso iyo 15-ka & 16-ka bisha Maarso 2022.
Haddaba sharikadda Adidas ee Jarmanka ee farsameeysa agabka isboortiga ayaa si rasmi ah u soo bandhigtay kubadda Champions League lagu ciyaarayo heerka knockout-ka, kaasoo hadda taagan wareegga 16-ka.
Kubaddan ayaa midab ahaan ka kooban loogada xiddigaha ah ee CL iyo loogada Sharikadda Adidas, waxaana ay ka kooban tahay midabada madowga, caddaanka, buluug, Jaalaha iyo casaanka oo isku shaqlan, taasoo la sheegay in laga hindisey qish laga qaatay Diinka.
Magaalada Saint Petersburg ee Waddanka Ruushka ayaa lagu ciyaari doonaa final-ka tartankan Champions League, waxaana kulanka kama dambeysta ah marti-gelinaya garoonka Gazprom Arena, kaasoo qaada 68 kun oo taageerayaal ah.
SAWIRRO:
Gool FM.