(Paris) 10 Jan 2022. Kooxda kubadda cagta Paris Saint-Germain ayaa lasoo warinayaa inay xiiso u muujineyso weeraryahanka kooxda Chelsea ee Romelu Lukaku iyadoo dooneysa inay lasoo wareegto sida ay wararku sheegayaan.
Mustaqbalka Lukaku ee naadiga Blues ayaa calaamad su’aal weyn la saaray tan iyo markii uu baxay wareysi uu ku sheegay inuusan ku faraxsaneyn hab maamulka macallinka naadiga ee Thomas Tuchel inkastoo uu markii dambe raalli gelin ka bixiyay.
Wargeyska El Nacional ayaa baahiyay in Chelsea ay dooneyso inay iska iibiso 28-sano jirka reer Belgium iyadoo durba uu bartilmaameed u noqday PSG.
Sidoo kale wargeyska ayaa intaas ku daray in kooxda Faransiiska ka dhisan ay diyaar la tahay inay 90 milyan oo euro ku qarash gareyso lasoo saxiixashada laacibkii hore ee Manchester United si ay u xalliso dhibaatada ka qabsan karta booska weerarka dhexe haddii uu Kylian Mbappe ka dhaqaaqo Parc des Princess.
Gool FM.