(Paris) 05 Feb 2022. Wararka ka imaanaya dalka Spain ayaa sheegaya in xiddiga kooxda Paris Saint-Germain ee Lionel Messi uu kaga digay macallinka naadiga Barcelona ee Xavi Hernandez inuu la saxiixdo laacibka baxsadka ka ah PSG ee Xavi Simons.
18-sano jirka ayaa kasoo dallacay da’yarta kooxda PSG isagoo kooxda waaweyn usoo dallacay xilli ciyaareedkan inkastoo uu saftay keliya shan kulan tartammada oo dhan, balse qandaraaskiisa ayaa dhici doona dhammaadka xilli ciyaareedkan, sidaas darteedna, waxaa lala xiriirinayaa Barca oo uu kulyaddeeda dhallinyarada ka mid ahaa.
Wargeyska El Nacional ayaa sheegay in Messi uu kaga digay Xavi inuu Simons bilaash kula saxiixdo suuqa xagaagan waxaana uu u sababeeyay inuu da’yarka reer Netherlands si caajis iyo gaabis ah uu horumarka u sameynayo, isla markaasna sababtaas awgeed ay Paris u dooneyso inay u iibiso laacibkan khadka dhexe ka ciyaara.
Dhinaca kale, Mino Raiola oo ah wakiilka Simons ayaa Barcelona ku wargeliyay inay xiddigan heli karaan sidoo kalena uu doonayo kusoo laabashada garoonka Camp Nou.
Gool FM.