(Paris) 14 Feb 2022. Kursiga macallinka naadiga Paris Saint-Germain ayaa shaki badan la gelinayaa maadaama macallinka haatan majaraha u haya ee Mauricio Pochettino lala xiriirinayo inuu dhammaadka xilli ciyaareedkan ka hayaamo Parc des Princess si uu u qabto xilka macalinnimo ee naadiga Manchester United.
Sidaas darteed, PSG ayaa dooneysa inay shaqadan ku wareejiso Zinedine Zidane balse weeraryahanka kooxda Faransiiska ka dhisan ee Lionel Messi ayaa kasoo hor jeeda aragtidan maadaama Zidane uu doonayo inuu dib ula soo saxiixdo xiddiga Man United ee Cristiano Ronaldo oo ay kasoo wada shaqeeyeen Real Madrid.
Wargeyska El Nacional oo warkan baahiyay ayaa intaas ku daray in Ronaldo uu wakiilkiisa Jorge Mendes ka dalbaday inuu koox cusub u raadiyo maadaama la dhibaatoonayo qaab ciyaareed xummada Red Devils, sidoo kalena ay PSG diyaar u tahay inay soo xero geliso kabtanka Portugal si ay ugu maaranto Kylian Mbappe oo qarka u saaran inuu bilaash ugu dhaqaaqo Real Madrid marka uu heshiiskiisa dhammaado xagaagan.
Si kastaba ha ahaatee, qorshaha madaxweynaha kooxda Ligue 1 ka ciyaarta ee Nasser Al-Khelafi ayaa ah inuu marka hore Zidane u magacaabo macallinka kooxdiisa kadidbna uu lasoo saxiixdo CR7, balse wargeyska sheekadan daaha ka rogay ayaa tibaaxay inuu Messi ka cago-jiidayo qorshaha madaxweynaha naadiga ka dhisan magaalada Paris.
Gool FM.