(Manchester) 14 Feb 2022. Kooxda kubadda cagta Manchester United ayaa noqotay kooxdii ugu dambeysay ee soo bandhigta xiisaha ay u muujineyso lasoo saxiixashada xiddiga khadka dhexe iyo garbaha kaga ciyaara naadiga RB Leipzig ee Christopher Nkunku.
Red Devils ayaa 24-sano jirkan ku darsatay diiwaanka xiddigaha ay dooneyso inay xagaagan u dhaqaaqdo saxiixood, waxaana qorshahan uu ku yimid soo jeedinta macallinka ku meel gaarka ah ee Ralf Rangnick.
Wargeyska ESPN ayaa sheegay inuu Rangnick doonayo inay kooxdiisa soo qaadato laacibka Faransiiska ah si uu baddel ugu noqdo xiddiga ay dhalasho wadaagga yihiin ee Paul Pogba oo mustaqbalkiisa shaki weyn la gelinayo.
Si kastaba ha ahaatee, Nkunku ayaa qaab ciyaareed wanaagsan ku jira xilli ciyaareedkan isagoo dhaliyay 19 gool halka uu caawiyay 13 kale kaddib 31 kulan oo uu tartammada dhan u ciyaaray kooxda Jarmalka ah fasalkan, waxaana uu bartilmaameed u yahay kooxo dhowr ah sida Manchester City, Real Madrid, Juventus iyo Paris Saint-Germain.
Gool FM.