(Paris) 14 Feb 2022. Kabtanka kooxda Paris Saint-Germain ee reer Brazil Marquinhos ayaa sheegay in ujeedka kooxda aanu ahayn inay ka hadlaan mustaqbalka Kylian Mbappé, balse uu yahay inay garaacaan Real Madrid.
Real Madrid ayaa habeen dambe ee Talaadada garoonka Parc des Princes marti ugu noqon doontaa Paris Saint-Germain, si ay u wada ciyaaraan kulanka lugta hore ee wareegga 16ka Champions League.
Marquinhos oo ka soo muuqday shirka jaraa’id maanta ee kooxda Paris Saint-Germain ayaa wuxuu yiri:
“Kulanka berri wuxuu noqon doonaa mid aad muhiim u ah, waxaan ku ciyaari doonaa garoonkeena, waana inaan isku daynaa inaan goolal dhalino si aan ciyaarta ugu guuleysano.”
“Waxaan la ciyaari doonaa koox weyn oo taariikh balaaran ku leh kubadda cagta gaar ahaan tartanka Champions League, sharaf weyn ayay ii tahay in aan u ciyaaro kooxda Paris Saint-Germain.”
“Kulankaas gabi ahaanba wuu ka duwanaan doonaa kulankii Coupe de France.”
Daafaca reer Brazil oo wax laga waydiiyay mustaqbalka Kylian Mbappé ayaa ku jawaabay:
“Ujeedkeenu maaha inaan ka hadalno Mbappé, balse waa inaan adkaano kulanka, taas ayaana ah waxa ugu muhiimsan, waxaan rabnaa Mbappe inuu noqdo mid faraxsan inta suurtogalka ah, wuxuu dareemayaa kalsooni, taasi waa waxa aan ku aragno gudaha garoonka.”
“Messi? Waxa aan rajaynaynaa in Leo uu ciyaaro kulan fiican, wuu degan yahay wuxuuna ku kalsoon yahay naftiisa.”
Gool FM.