(Manchester) 16 Feb 2022. Weeraryahanka kooxda kubadda cagta Manchester United ee Cristiano Ronaldo ayaa mustaqbalkiisa shaki weyn la gelinayaa iyadoo la filayo ay warar badan sheegayaan inuu doonayo ka hayaamidda Old Trafford hal xilli ciyaareed kaddib soo laabashadiisa.
Wargeyska The Sun ayaa sheegay inay kooxaha Paris Saint-Germain, Bayern Munich iyo AS Roma ay indhaha ku hayaan xaaladda Ronaldo iyagoo xiiseynaya saxiixiisa tan iyo markii uu wakiilka laacibkan ee Jorge Mendes kulan la qaatay maamulka Man United.
Inkastoo uu 14 gool ka dhaliyay isku darka horyaalka Premier League iyo tartanka Champions League xilli ciyaareedkan, haddana 37-sano jirkan ayaa bandhig liita la yimid tan iyo markii shaqada macalinnimo ee naadiga Red Devils si ku meel gaar ah loogu dhiibay Ralf Rangnick.
Si kastaba ha ahaatee, PSG ayaa u muuqata kooxda ugu cadcad ee gacanta ku dhigi karta Ronaldo maadaama ay cudud dhaqaale u heyso bixinta mushaharkiisa.
Gool FM.